1994.  Ek woon in Pretoria en reis daagliks werk toe na Endicott naby Springs.  Die reis vat my oor Babsfontein, duskant Delmas draai ek af na Eloff en so tussen die plase deur kom ek uiteindelik by my bestemming uit.  Ek beleef al die seisoene:

 

                      HOëVELDHERFS

 

Oorkant die wenakker staan

die mielieplante asof in gelid.

Hulle stuifmeelkrone,

volgeswelde koppe en

ou verinneweerde blare

is in 'n eentonige agtergrond

van vaalgeel en effe groen versmelt.

 

Sonneblomme met blare verdor,

ryp koppe berustend gebuig,

breek soms die kleurpatroon

na dofswart en geel.

Duskant is die swartgrys teer

wat vorentoe blinkend

met die horison skakeer.

 

Tussen dié twee grense vasgevang -

so ver as 'n mens se oog kan sien,

duisende spikkels helderwit vermeng

met ouderlingpilletjiepienk.

Dit is herfs op die Hoëveld

en langs al die paaie

staan die kosmos vol in die blom