Dis nodig om die Godheid van Jesus te erken veral aan die hand van hoe Hy in Openbaring beskryf word.  Partykeer egter is ons so bewus van Jesus se Godheid dat ons Hom so hoog verhewe beskou dat ons verkeerdelik aanvaar dat Hy nie met ons kan vereenselwig nie.  Ons voel dan Godverlate maar ons vergeet dat Hy juis mens geword het om met ons en ons probleme te kan identifiseer.  Ons hoor ook ons moet vir ons naaste soos Christus wees en ons raak maklik verward tussen hierdie wisselwerking van Christus en mens wees.  Dit het my aan die dink gesit:

 

                       MENSWEES

​

Érens het ek gelees

Jy moet vir jou naaste soos Christus wees

maar die betekenis hiervan het my bly ontwyk

want ek was van mening dit is buite ‘n sondaar se bereik .

 

Ek het verder gelees

en ontdek dat Jesus God is maar was ook mens gewees ,

net soos ons lief en leed ervaar

maar het ‘n besondere passie teenoor sy naastes geopenbaar .

 

Hy soek Saggeus op daar eenkant , hoog in ‘n boom

n in ‘n skare voel Hy ‘n vrou vat aan Sy kleed se soom .

Teen die tradisie van Sy tyd gesels Hy met ‘n vrou

en aan die veroordeelde egbreekster sê Hy : “ Ek vergewe jou . ”

 

Ek lees ook van Jesus wat aandag aan kinders bestee ,

en wat voedsel aan ‘n  honger skare mense gee

en ek verstaan Johannes as hy tot die slotsom kom

dat daar nooit genoeg boeke geskrywe kan word oor Hom .

 

Uiteindelik is dit geen hoge teologiese geheim

om Christus se lig  oor jou naaste te laat skyn .

Inteendeel , die eenvoud van hierdie opdrag verras :

jy moet net vir jou naaste mens wees soos Jesus was .