Baie keer sneller iets jou om ou herinneringe op te diep. Party keer plaas 'n mens dit op papier en daardie historiese gebeurtenis, eie aan jouself word dan 'n Memoir. Nadat ek hierdie gedig geskryf het, het ek besef dat elke gedig eintlik 'n Memoir is en dat die somtotaal daarvan my Memoires bevat.
​
MEMOIRES
Jou eie wêreld se persoonlike biblioteek
diep in jou onderbewussyn weggesteek
duisende geïllustreerde boekies onsigbaar klein
geberg in die talle grysstofselle van die brein.
Die oë het elke unieke lewenstoneel afgeneem
die storie daaragter deur die geheue opgeneem
teks en prent is deeglik as ʼn eenheid geredigeer
elke storieboek iewers in die biblioteek geliasseer.
Party boeke gereeld gelees, onthoú vars ervaar
andere al vergeet en staan net en stof vergaar
soms word daar in die biblioteek rondgedwaal
en ou boeke word uit hulle bergplekke uitgehaal.
Omslag afgestof en die geel ou blaaie oopgeslaan
woorde gretig gelees om te onthou wat daar staan
die prentjie daarnaas van hoek tot kant beskou
gretig om elke aspek daarvan in detail te onthou.
Op dié wyse word op ver-ver paadjies teruggeloop
ou herinneringe opgediep oor baie jare opgehoop
skiélik staan gister ʼn mens helder voor die oog
met taferele afgespeel op jou eie lewensverhoog.
Miskien kan iemand anders uit daardie stories leer
alternatiewe lewensrigting bied; growwe foute keer
as ʼn begin om andere van jou lewensstories te vertel
moet jy die pen opneem om jou Memoires op te stel.