Mense is 'n integrale deel van die skepping.  Maar wie is ons, hoe vertoon ons teenoor ander objekte in die skepping.  Ek het gaan sit en begin onderskei in welke mate 'n mens gedefinieer kan word.  Daar is waarskynlik nog baie definisies wat gemaak kan word, hierdie was my poging:

 

                  WAT IS DIE MENS ?

 

In moederskoot aanmekaar geweef

met verstand wat kan redeneer,

wat kan onderskei tussen goed en kwaad.

Denke

wat die verste horisonne kan verken of

wat tot in die diepste duisternis  delf.

 

Elke indiwidu met sy eie unieke DNS,

ʼn liggaam atleties, soepel en gespierd

of gestremd.

Sintuie funksioneel en skerp,

soms net gedeeltelik

of niks.

 

ʼn Onsterflike siel

wat terughoudend of spontaan,

vrolik, bedees , soms bedruk

woorde uiter deur sê, skree, fluister

of woordeloos praat deur net aan iemand te vat.

Woorde aandagtig  luister, weeg en ontleed of

belangeloos, halfhartig met ʼn halwe oor hoor

of ignoreer deur ʼn dowe oor te draai.

Met andere kommunikeer:

geselsend, oorredend, oordonderend,

troostend, paaiend,

vraend, pleitend, smekend

of net bid.

 

Dit is die mens,

ANDERS

as enige ander wese wat leef.