Die vermoë om te kan sien is 'n ongelooflike stuk genade.  Nog meer as 'n mens kleure in die volle spektrum waar kan neem.  Besef ons werklik wat iemand mis wat nie ten volle kan sien nie.  'n Interessante aspek van kleur is natuurlik dat dit slegs in die teenwoordigheid van lig waargeneem kan word.  In die donkerte kan 'n mens nog beelde en vorm onderskei maar die kleur is weg.  Soos die omgewing helderder word, word die kleur sigbaar.  'n Ander aspek is natuurlik of verskillende mense kleur op dieselfde wyse sien?

 

                            KLEUR

 

'n Bloedswart blom,

kanariegrysgesproet,

afgeëts teen die kontras

van 'n bottelwit veld.

Absurd maar waar -

was die Skepping

net in skakerings

van wit en swart.

 

'n Titseltjie blou

spatsels geel,

reënboogskakerings,

die warmte van rooi

verfraai, verhelder, versag.

Die Skepper se kwas

het die wêreld getooi

in 'n kaleidoskoop van kleur.