Jul 2019. Een van ons Omgeegroeplede, Japie Venter, was voorheen voltyds by sendingwerk in Zambie betrokke en is nou amptelik afgetree. Hy spandeer egter nog steeds tyd in Afrika om andere op te lei om boormasjiene te opereer. Dit was sy bediening - om water aan gemeenskappe te voorsien en op die wyse die mense ook te leer van die Lewende water. Op sy afgelope besoek waar dit hoofsaaklik om opleiding gegaan het, het die Here steeds voorsien en is sterk water vir die plaaslike gemeenskap raakgeboor. Loof die Here.
​
BOORMAN SENDELING
Die wieg van die mensdom is hier te kry
maar vooruitgang het relatief ver agtergebly
ʼn plek waar dit eerder swaarder as beter gaan
massas mense voer daagliks ʼn sukkelbestaan.
Oorlewing word nie vanselfsprekend aanvaar
elke dag is weinig sien en kom daarmee klaar
kos is skaars dis raap en skraap en stapeldieet
van water uit ʼn kraan moet mense liefs vergeet.
ʼn Wêreld van warm son waar alles water vra
daagliks van wie weet waar in houers aangedra
hoe dan anders dat water die middelpunt raak
vir mense verskil tussen dood en lewe maak.
Ek wonder of die eerste wêreld van hulle weet
genadige God het nog nooit van hulle vergeet
tot in die verste hoeke van kontinent Afrika
word die Evangelie aan alle nasies uitgedra.
ʼn Boerseun met baie passie en ʼn boormasjien
is deur God gestuur om begenadiges te bedien
hy bid en die Here wys die presiese plek waar
die boorpunt moet sak tot by ʼn waterryke aar.
Die masjien eentonig dreun, orals warrel stof
eensklaps water wat spuitend omhoog ontplof
God se seën word sigbaar oor almal uitgestort
ook dat Hy vir hulle die Lewende water word.