Die lewe vorm en skaaf ons.  In wese is ons niks maar genadiglik is daar Iemand wat Hom oor ons ontferm en van niks iets maak.  Die Here het van eenvoudige vissermanne die fondament van sy Kerk gemaak.  So is daar talle mense wat kan getuig dat hulle uit 'n eenvoudige agtergrond gekom het  en in suksesvolle individue ontwikkel het.  Op geestelike vlak is dit net so belangrik.  Van nature is ons God vyandiggesind maar Hy tel ons op en verander ons ten goede.

 

                         HERSKEP

 

Vergete stuk hout, hard gegrein,

kwistig gekwas, termietgevreet,

skurf van bas.

Nuttig net om te brand

tot gryswit as.

 

Die Beeldhouer soek en vind die weggooihout.

Verby die ruheid en verweerdheid

van die klipharde stomp sien Hy reeds

Sy beeldhouwerk volmaak uitgekerf.

 

Bas brokkel weg as die saaglem

rofweg vorm gee.

Beitelhoue byt en splinters spat

terwyl die grein teen die geskaaf

en geskuur weerstand bied.

 

Die Beeldhouer geduldig, beitel geleidelik weg

die splinters en kwas wat die beeld ontsier.

Hy poleer en poets tot die grein versag

en die hout, eens dof en dood

word 'n sieraad van glansend prag.

 

.