God se verhouding met my as 'n individu bly ongelooflik kosbaar.  By wese van spreke sê ons altyd ons lewens is in God se hand.  As 'n mens meer fisies daarna kyk en ontleed hoe dit vergelyk op 'n menslike vlak dan kan 'n mens dit as volg sien:

 

                   HAND IN HAND

 

My hand in God se hand

is nie in 'n dominerende greep

wat stoot en trek

en van my 'n marionet maak

wat net willoos knik en strek.

 

En tog ......

my hand in God se hand

is nie so lossies en belangeloos vasgehou

dat dit my ankerloos laat sodat as ek

struikel of val dit vir my doodsgevaar inhou.

 

Eerder is ......

my hand in God se hand

soos 'n kleuter wat aan pa se vinger hang,

vry om te los en te verken

maar altyd 'n veilige hawe byderhand

as hy begin onseker voel of bang.

 

Ook is .....

my hand in God se hand

soos die vingers van jong minnaars wat

vroetel , vleg en inmekaar verstring,

wat koesterend tas en streel en

aan mekaar innerlike voldoening bring.

 

Nog meer is .....

my hand in God se hand

soos die hande van 'n ou getroude paar

wat knus passend palm teen palm rus en

meer sê as wat daar woorde is.

.