Jesus was stil aan die kruis met die uitsondering van die sewe kere wat Hy Sy bekende kruiswoorde geuiter het en wat in verskeie van die Evangelies opgeskryf is.  Ek het dit as volg opgesom:

​

                          KRUISWOORDE

 

Die wereld se lig aan die kruis in pyn,

besig met sy liefdesplig om God en die mens te versoen.

Bid Hy vir Jood en Romein:

“Vader vergeef hulle almal, want hulle weet nie wat hulle doen.“

 

Die misdadiger langs Hom spot:

“red jouself,“ saam met die skare alom,

“Jy is mos die Seun van God.“

Maar pleitend kom vanaf die ander kruis:

“dink aan my as U in U koninkryk kom “

En die antwoord: “Dit verseker ek jou,

vandag sal jy by my wees in die paradys"

 

Alleen in Sy hellesmart,

verloën, verwerp, verlaat,

tog steeds met ‘n  liefdeshart

besorg oor beste vriend en ma.

Ondersteunend aan mekaar oorgelaat:

“Moeder, daar is U seun en seun daar is jou ma."

 

Die geestelike stryd woed fel

in die mens aan die kruis vasgenael

want onskuldig ervaar  Hy die hel

vir ander  se sonde wat God so haat.

In smart ter helle neergedaal

roep Hy beangs omhoog:

“My God, My God, waarom het U My verlaat!"

 

Ook Sy liggaam word blootgestel

aan lyding, aan pyn aan seer,

in Sy volle ervaring van die hel.

Met Sy kop willoos op Sy bors

en Sy liggaamskragte uitgeteer,

Kom oor sy lippe prewelend: “Ek het dors.“                                                                                               

 

Sterwende aan die vloekhoutpaal

het vir baie net nog ‘n mens ophou bestaan,

min wetende God het vir die mensdom die losprys betaal.

Vandag kan gelowiges jubelend sing

omdat hulle nou die volle betekenis verstaan

van Sy luide , weergalmende kreet:

“Dit is volbring!“

 

“Vader in U hande gee Ek My Gees oor, “

net voordat Hy Sy laaste asem sug,

is Sy laaste woorde op Golgata gehoor.

Sy Woord het egter nooit ophou bestaan

en keer ook nooit leeg terug.

Die Woord is lewend

want Jesus het opgestaan.