2018. Ons Omgeegroep behandel Jakobus 5 wat oa 'n waarskuwing aan "Rykaards" inhou. Wanneer is jy ryk en wanneer is jy arm? Arm en ryk is relatiewe begrippe - ons besef goed as iemand ryker as onsself is maar selde besef wanneer iemand armer is. Arm en ryk is ook nie net tot fisiese besittings beperk ie maar kan van toepassing op gesondheid, verstand, ens gemaak word
ANTITESE ARM EN RYK
Armoede en rykdom gepolariseerd uiteengeset
oor diegene wat nie het nie en die wat baie het
soos werkloses wat meestal koud en honger kry
en die welgesteldes wat weelderig leef en bly
arm en ryk nie net tot fisiese besittings beperk
alle fasette van daagliks leef word daarby betrek.
Krap daagliks vir kos tussen rommel met die hand
geniet gereeld buffet of a la carte in ʼn restaurant
maaltye word hoofsaaklik uit stapelvoedsel berei
gesonde dieet direk vanaf die winkelrakke verkry
karige etes, stadig gekou, bietjies bietjies afgesluk
eksotiese disse gedetailleerd op spyskaarte gedruk.
Partykeer ʼn paar koperstukkies in ʼn gebakte hand
een van vele kredietkaart wys soos ʼn towerwand
ʼn werkie hier, ʼn werkie daar bring ʼn paar sente in
salaris gereeld gedeponeer op persoonlike rekening
met stokvel dan en wan ʼn bonusbetaling realiseer
gereelde inkomste uit aandeelbeleggings genereer.
Geslaap onder koerantpapier op ʼn kartonmatras
satynsag lakens en wolkomberse uit die linnekas
harde sement of yskoue vloer waar die lêplek is
hemelbed en diep matras waar die lyf lekker rus
ongemak forseer die lyf in fetusposisie op te krul
rustig slaap en onderbewussyn met drome gevul.
Vroegoggend ʼn vel wat net vuilheid en koue voel
ontspanne met louwarm water wat lyflekker spoel
sweet stink salpeterskerp uit die omgewing terug
neuse gevul met parfuum subtiel gedra op die lug
reuk van sunlightseep en rook verklap waar jy bly
begunstig as jy ʼn spa besoek en lyfmasserings kry.
Toiingrige hemp, verslete broek skurwe voete kaal
bypassende kledingstukke uit die klerekas gehaal
tweedehandse klere nie meer deur eienaars gedra
status wat in die mode handelsmerk en etikette vra
paar kledingstukke in eie besit verslete en gebleik
klere en skoene genoeg om altyd op die beste te lyk.
Stegies of onder brug word die plek waar jy plak
ʼn woning enige iets klein of groot maar onderdak
dalk net ʼn sinkpondok op posseëlgrootte perseel
huurhuis tot landgoed met ʼn imponerende kasteel
blyplek maar nooit ʼn plekkie wat jy jou eie noem
gelukkiges wat op meer as een woning kan roem.
In wind en weer op ʼn stowwerige sypaadjie loop
gefrustreerd in ʼn voertuig in verkeer vasgeknoop
volgeprop in ʼn taxi skouer met insittendes skuur
alleen in ʼn klimaatbeheerde sedan agter die stuur
die hele lewe lank net op apostelperde aangewys
wêreldwyd per pad en spoor, ter see en lug gereis
Ervaar as horende doof, siende blind, pratend stom
ongeskool geen geleerdheid wat van kindsbeen kom
beskou as onbekwaam, onbevoeg, dom soos ʼn klip
of belese, berese, ervare gereken en vlug van begrip
ongeletterd werkersklas miskien blouboordjiebrigade
deel van senior bestuur en sitting op verskeie rade.
Selde sonder swaarkrypyne en skete, fisiek gewond
fiks, gespierd en in die algemeen liggaamlik gesond
afhanklik, sintuiglik gestrem of verstandelik vertraag,
skerpsinnig, geniale bate wat die gemeenskap behaag
emosioneel onstabiel, dissipelskap in die dwelmhel
formidabele figuur, leier, gesagspersoon, ʼn rolmodel.
Werklike kwessie nie dié van materieel arm of ryk
maar hoe die geestelike rykdom van enige mens lyk
brandarm en ingesinslyks ook arm in gelowig wees
iemand kan superryk wees maar tog nederig van gees
ontbreek aan wêreldsgoed maar standvastig in geloof
skatryk in besittings maar vir genade horende doof.
Onvergenoegd met te min, selfvoldaan met te veel
negatiwiteit soms deur beide armes en rykes gedeel
die armes murmureer, die rykes op soek na nog meer
God word blameer of die rug word op Hom gekeer
helaas aardse skatte word deur mot en roes verniel
skatte in die hemel het ewigheidswaarde vir die siel.