Julie 2017. My kleinkind Mila is nou 20 maande oud. Lenore, haar Ma, het die gewoonte om as sy iets besonders aan Mila wys, haar sin in te lui met WoW! So, as sy verwondererd is oor iets, volg daar 'n WoW! Hoe gee 'n mens uiting aan jou bewondering vir God veral as jy al jou sintuie kan inspan om dit te doen. Ek dink ek kan dit nie beter doen as met dieselfde kinderlike uitdrukking van; WoW! nie.
WOW!
WOW!
Kinderlike klank uit my kleinkind se keel
oor iets wonderliks wat daar en dan haar
aandag steel.
WOW!
Elke oomblik oorstelp uit my dankbare gemoed
oor GOD Drie-enig so groot en so goed!
WOW!
Verstom oor al Sy werke wat my oë kan aanskou
en hoe Hy die ganse skepping daagliks onderhou.
WOW!
Dankbaar dat donder en dreun sy bangmaakklank verloor
en ek Sy stem in die sagte aandwindjie kan hoor.
WOW!
Wanneer lekker geure van kosse in die lug bly hang
en my herinner dat ek alle gawes uit Sy hand ontvang.
WOW!
As die smaak van wyn talmend in my mondholte bly lê
en ek weet dat ek deel aan Sy Hemelse feesmaal gaan hê.
WOW!
Tasbaar bewus dat as ons mekaar se vingers voel
dat niks of niemand ons ooit uit die Vader se omhelsing kan woel.
Geseënd bewus dat ek al hierdie dinge kan weet en verstaan
HERE, neem asseblief my WOW! as ʼn loflied aan.