2019. Nav 'n gesprek word ek herinner aan die magdom reëls waaraan mense gedurigdeur onderwerp word. Almal, het tot 'n mindere of meerdere mate tydens hulle opvoedingsjare daarmee te doen gehad. Ouers, onderwysers en predikante het almal meegedoen om die regte lewenspad te identifiseer. Alle aspekte van die lewe is onder die loep geneem. Kleredrag, haarstyl, musieksmaak, taalgebruik, vriendekring, ens. ens. was daaglikse besprekingspunte en "leiding" is gegee oor die reg en die verkeerd van die lewe. In die proses is 'n n uwe geslag navolgelinge of rebelle gekweek. Die boodskap wat Jesus gebring het, was om mense van sonde maar ook matelose wette en regulasies te bevry.
​
ERFSONDE
ʼn Konstante refrein van mag nie, moenies en moet
daagliks gebombardeer op ʼn naïewe kindergemoed
meestal goedbedoeld deur besorgde ouers afgeforseer
om hulle kinders koersvas van verkeerde weë te keer
oorgeërfde reëls getrou van geslag tot geslag oorgedra
sonder om sin en redelikheid daarvan enigsins te bevra
menige daarvan sal ooit die toets van logika deurstaan
maar sal as “sommer” as die waarheid bly voortbestaan.
Lewensvryheid word sò goedsmoeds maksimaal beperk
massas reëls wat geld - tuis, by die skool, ook die kerk
paranoïes, satan en sonde wag om elke hoek en draai
trap in jou spoor of verseker in die hel gaan jy ewig braai
die lewensvisie draai suiwer om in jou pasoppens te bly
jou grootste vrees word om van die nou pad af te gly
oorbluf, onseker, maar gehoorsaam durf jy die lewe aan
geindoktrineer oorbewus van jou loop, jou sit en jou staan.
Hartseer maar waar, êrens het iemand ʼn opinie bereik
sonder om die meriete van daardie idee deeglik te bekyk
kort voor lank word dié siening as enige waarheid versprei
ongeag of die dwaling tot gespanne menseverhoudings lei
die impak van outorotêre opvoeding word maklik voorspel
die nuutste generasie is of ʼn dissipel of ʼn uitgesproke rebel
dié tipe dissipelskap lei dikwels tot leef met oogklappe aan
rebelsheid loop gevaar om uit beginsel alles teen te staan.
Sware wettisisme wat Fariseërs van gewone mense wou hê
deur Jesus opgesom as om God en mekaar hartlik lief te hê
eerder as om fanaties splinters in jou naaste se oog te soek
draai die wang of loop die tweede myl saam, is Sy versoek
nie net het Sy revolusionêre leringe mense oorbluf gelaat
Sy begripvolle optrede het getuig van liefde, nooit van haat
Hy wil mense verlos van die sware juk van sondeslawerny
sodat hulle vreesloos vreugdevol volkome vryheid kan kry.
​