Dit is 2018.  Dit is landswyd droog met kritiese afmetings in die Wes-Kaap.  Kaapstad het erge waterbeperkings en skielik begin almal besef dat water nie noodwendig 'n gegewe is nie.  Ons dink en ons praat gedurig oor water.  Water is eintlik 'n wonderlike ding, kom in verskeie vorme voor en skielik begin 'n mens opnuut water opmerk.  Verskillende woorde beskryf dit, dit kan verskillend van kleur wees, water is lewe.  

 

                            WATER

 

Glinsterende druppels dou

wat sonligstrale gevange hou

ry op ry neffe mekaar ingepak

op die ragfyn sy van ʼn spinnerak.

 

As wolke bo dig begin saam te pak

verwag ons reën uit die hemeldak

soms druppeltjies om kwalik nat te word

andersins emmersvol wat benede stort.

 

Ervaring leer winter is voor die deur

as eerste ryp die grasperk spierwit kleur

winterkoue is uiteindelik in volle swang

as sneeu in lae pak teen die berg se hang.

 

Winteroggend en mens se warm asem

op die windskerm gedeponeer as wasem

voordat die voertuig vorentoe beweeg

word die nat gryserigheid  weggeveeg.

 

Dansers en atlete se vaardighede wys

as hulle girts-garts skaats oor die ys

ʼn koele lafenis aangebied aan ʼn gas

met ysblokkies wat rinkel in die glas.

 

In die kombuis ʼn ketel aan die kook

met stoom bollend  uit die tuit soos rook

potjiekos op kooltjies  stadig aan die prut

onder die deksel ontsnap stoompies pst-pst.

 

Helder water deursigtig net soos glas

diepe waters blou, troebel grys soos as

kabbel, vloei, stroom, stort en drup

word daagliks deur als wat lewe benut.

 

Water is kokend warm, lou of ysig koud

dit smaak vars, soet, brak of pekelsout.

water oraloor, in, aan op, onder en omgewe

dit is ʼn integrale deel van als wat lewe.

 

Water, drie atome as een gemoleluleer

wat vele aansigte na die aanskouers keer

is daar dalk ʼn ooreenkoms te bespeur

as ons dorstig die Lewende Water begeer?