2019 'n Getroude dame met drie tieners word met borskanker gediagnoseer en haar ouers versoek dat daar vir haar gebid word. Ek het die voorreg gehad om haar heelwat later te ontmoet en sy het haar dank oor die gebede teenoor die aanwesiges uitgespreek. Dit het my aangeraak met die besef dat ons baie maklik vir iemand noem dat jy vir hom / haar sal bid want omstandighede laat nie altyd toe dat jy dit daar en dan kan doen nie. Die ideaal is natuurlik om dit dadelik te doen want dan kan die persoon hoor waarvoor jy bid en die gebed persoonlik ervaar. in hierdie geval het omstandighede verhinder dat ek daar vir haar kon bid maar ek wou tog he dat sy dit persoonlik kon ervaar. Dit het my ookm laat dink aan Petrus wat vir die verlamde gese het: goud en silwer het ek nie maar wat ek het, gee ek vir jou in die naam van die Here:
MIN MAAR TOG DIE MEESTE
Jou wêreld het meteens ineengestort
siekte het deel van jou lewe geword
die groot K is in jou lyf gediagnoseer
die dokters moes onmiddellik opereer
aggressiewe chemoterapie nodig gewees
om jou blywend van kanker te genees.
Siekte se impak enorm op mens se gees
ʼn onderliggende metgesel nou is vrees
die lewe was eers gelykmatig en goed
onsekerheid knaag nou aan jou gemoed
een oomblik is die toekoms helder blink
moeg en naar laat donker gedagtes dink.
Om jou mense wat jou las wil help dra
maar onseker oor wat te sê wat te vra
siekte laat medemense ongemaklik voel
dikwels onbeholpe dinge sê onbedoel
tog bly die hunkering om te ondersteun
ʼn skouer te bied waarop iemand kan leun
Wat ek vir jou in gebed van die Here vra
dat Hy jou daagliks deur beproewing dra
as jy moedeloos onder ʼn bos wil gaan sit
weet dat die Heilige Gees self vir jou bid
jy nie angstig oor die toekoms wakker lê
maar die vrede wat net Jesus bied, sal hê.