Mei 2018. Ek lees die Tien Gebooie in Eksodus 20. In vers 11 wat handel oor die Sabbatdag word die aanhaling gemaak: God het die hemel en alles daarin, die aarde en alles daarop, die see en alles daarin gemaak en op die sewende dag het Hy gerus. DIe gedagte het by opgekom dat die mense van daardie tyd min begrip oor die hemel gehad het en ingelyks ook oor die see, die aarde het hulle elke dag ervaar, daarom word daar na "op" verwys versus "in" by die hemel en see. Hoe dit ookal sy, met die kennis wat ons vandag het, word God se skeppingsmag net groter en bly die detail en omvang van die skepping vir my net ongelooflik. Prys die Here!
EKSODUS 20: 11
DIE HEMEL EN ALLES DAARIN.....
My oë priem die hemelruim
terwyl ek opkyk na God se sterretuin
miljoene spikkels wit
wat flonkerend teen ʼn swart lap sit
van dofweg klein
tot grotes wat helderblou skyn
op dié kunstenaarsdoek
bly my oë die sterrebeelde soek
soos Suiderkruis
en Orion wat kolossaal oor alles verrys.
Elke keer verstom
dat die prent nie van ʼn plat vlak kom
maar driedimensioneel strek
oor afstande in duisende ligjare uitgewerk
sterretjies klein
tog waarin die son duisende kere verdwyn
verterende vlamme vuur
wat lig tot aan die heelal eindes stuur
lankal uitgebrand
maar oneindigheid hou ligstrale in stand.
Die dag breek
die sterrehemel word in sonlig weggesteek
Oos karmosynrooi
omgetower na blou soos die dag ontdooi
die son prominent
in sy gang daarbo wat na die Weste wend
laatmiddag voel
asof die vuurbal uitasem raak, die lug verkoel
kaleidoskoop kleure skyn
soos die son geleidelik dan vinnig verdwyn.
Elke nuwe dag
word op die Kunstenaar se impressionisme gewag
wat met wolke speel
die lug daarbo in blou, grys, swart en wit verdeel
soms strepe slierte verf
of bolwangstapels asof uit spierwit marmer kerf
of kartel en kam
soos brandertjies op die oppervlak van ʼn dam
soms ʼn grys gordyn
toegemaak alle ander kleure daarbo laat verdwyn
DIE AARDE EN ALLES DAAROP.....
Unieke blou planeet
wonderbaar deur God beplan en uitgemeet
driekwart oppervlakte see
die ander as land aan mens en dier gegee
die landmassageheel
in sewe kontinente oor die oseane verdeel
geleë alle kante van die sfeer
bring blootstelling aan verskillende tipes weer
ekosisteme ontstaan
waar verskillende fauna en flora by bestaan.
God’s kunstenaarshand
sigbaar oor berg en dal, van kus tot binneland
landskappe ontstaan, verdwyn
vlaktes, vlei, krater, klip, moeras, bar woestyn
sand, leem en klei
afsonderlik of gemeng in die grond te kry
rotse, kranse, klippe gekleur
gespoel, gestol, gesteen besig om te verweer
water, blinkend of blou
kabbelend vloei of staande in poele, mere hou.
Smaak, sien, voel en ruik
die verskeidenheid van ʼn asemrowend planteryk
eensellig in swam en mos
tot gras, struik en boom in die veelvoud van bos
ontkiem en vergaan
waar die saad val daar bly die plant lewenslank staan.
blomme versier
en plant en vrug dien as voedsel vir mens en dier
hout brand of bou
die natuur se bydrae om die mens in stand te hou
Beweging waar jy kyk
op pad êrens heen, kenmerkend van die diereryk
vlug, vreet of jag
dit seil, vlieg, waggel, wriemel, wei dag en nag
van onsigbaar vir die oog
tot reuselywe tonne swaar, koppe hemeelhoog
nie ʼn oomblik stil
die lug met vlieënde insekte, diere en voëls gevul
as heerser gekroon
mense van alle tale, kulture wat die wêreld bewoon.
​
DIE SEE EN ALLES DAARIN.....
​
Water, nogmaals water
deinings dryf van diep tot branders teen rotse klater
strande wit omsoom
hou die magtige watermassa tot sy grense in toom
gedurig aan die woel
stromend, brekend tot waar water in poeletjies spoel
turkoois by koraal
branderskuim wit en donkerblou waar die dieptes daal
water smaak sout
louwarm in die trope, nader aan die pole vriesend koud
Lewensvorme wemel
oor die wye spektra van hierdie waterhemel
swem, kruip en dryf
al wat stilsit, is die skulpe geanker aan rotse styf
dis of alles sweef
tog vinnig deur vinne of spuitstelsels voortgedreef
suurstof word uit water absorber
vir asem moet ʼn paar terug na die oppervlakte keer
vir kos word of geaas
of speel die grootste en effektiefste predatore baas
Van alles en nog wat
onbekend wat nog weggebêre is in die see se skat
wesens tuis op sand
andere skuil weg tussen korale of rots se wand
visse vaartbelyn
swiepend deur die water seeleeu, rob en pikkewyn
krappies wat in poele speel
tot vreemde karikature wat die donker dieptes deel
kreef en garnaal
haai, orka, seekat en walvisse met plankton as maal.
Die oseane word ook betree
deur mense wat daaruit lewe en ook benut as weë
vissermanne vaar daagliks uit
keer saans terug leeg of vol visse saam in die skuit
skepe steek oseane oor
van hawe tot hawe met vragwerk vir die stuwadoor
Jona het van God probeer vlug
na drie dae in die vis se buik was hy gestrand terug
die see altyd onder God se wil
Jesus stap op die see, Hy beveel die stormsee stil.
GOD HET GERUS.....
God het op aarde neergedaal
eers woes en leeg volgens die skeppingsverhaal
alles wat daar is
het God gemaak en op die sewende dag gerus
die werk voltooi
God het behaaglik teruggestaan, dit was mooi
Hy het gevorm en geverf
niks was verkeerd nie, niks het die prag bederf
van hoek tot kant
hemel, aard en see geskryf deur Sy Skeppershand
Met alles bo gesê
die omvang van die skepping is kwalik blootgelê
baie reeds geopenbaar
maar nog so baie wat die mens nie kan verklaar
hoe objekte eintlik lyk
te klein, te ver, net eenvoudig buite ons sigbereik
en niks is geïsoleer
daar is gedurig interaksie tussen als heen en weer
niks bestaan individueel
alle skakels saamgevoeg vorm ʼn ketting in geheel.
ʼn Onuitputlike bron
van skeppingswerke wat alles van God af kom
soveel gemaak
mense se ondersoekdrang kan nie uitgeput raak
en hoe meer ons leer
so ontdek ons dat God’s wysheid en almag is meer
ver bo ons verstand
alles sienlik en onsienlik is gemaak deur Sy hand
die mens die kroon
alles gemaak sodat ons die skepping kan bewoon
Gegee om te bewerk
die onderskeie skepsels met unieke name te merk
gegee om te geniet
die harmonie wat God se ganse skepping ons bied
mens as heerser aangestel
om aan God en mekaar van Sy skepping te vertel
van Sy teenwoordigheid bewus
saam met ander in Sy wonderlike skepping te rus.
satan en sonde verskyn
die mens uit die Paradys en vrede en rus verdwyn.