Pinkster is 'n hoogtepunt op die Christelike kalender.  Dit herdenk die uitstorting van die Heilige Gees.  Jesus het inderdaad met sy hemelvaart belowe dat Hy iemand in Sy plek stuur om altyd  by Sy dissipels te wees: die Heilige Gees, ons Trooster.  Hy woon in ons, wys ons die sonde uit, wys ons na ons Verlosser toe en bid vir ons.  Ons is nooit, nooit alleen nie.

 

                          PINKSTERFEES

 

Vrolik en bly is die bewegings en liriek

op ritme en klank van gewyde musiek.

In feestelike stemming word God met eer bejeën

want Hy het die oes oorvloediglik geseën.

 

Sy reën uit die hemel gestort, deurdrenk

die aarde en lewe word aan die saad geskenk.

Die pit ontkiem en groei tot 'n koringaar

wat buig onder die oes oorvloedig swaar.

 

Soos tonge van vuur het Sy Gees van bo

op Sy dissipels gedaal sodat ander ook kan glo.

Die ou mens, klipharde hart en selfsugtig gesentreer

het gesterf en dra nou heilsaam vrug tot Sy eer.

 

Die opbrengs van die oes het blydskap gebring

en daarom kan ons oor Pinkster jubel en sing.

Gaan triomferend na alle nasies met woord en lied

want ons kan liefde en vrede aan ons medemens bied.