Dis 2016 en 'n klomp dinge gebeur in my en my gesin se lewens wat alles deurmekaar krap en ons met 'n klomp onsekerhede laat. Ek het weer soos baie keer al voorheen net bevestiging gesoek dat ons lewens darem nog op koers is. Ek stap een aand en omdat ek lief is om na die sterre te kyk, het my oe onwillekeurig boontoe geneig en daar sien ek toe my geliefkoosde sterrebeeld: die Suiderkruis. Dit was asof die sterrebeeld helderder was as normaal en amper in isolasie daar gesit het en toe skielik besef ek maar dit is 'n koersaanwyser en die volgende het daaruit gevloei:
SUIDERKRUIS
Twee helder sterre
wat respektiewelik Alfa en Beta Centaurus heet
bomekaar in ʼn amper vertikale lyn uitgemeet.
As “Wysers” laat hulle sig boontoe styg
na ʼn vyfsterkruis wat plat sywaarts neig.
Die ankerpaal, links na regs, in lengte meer
as die dwarsbalk, skuinsweg daaroor gedrapeer.
Skaars sigbaar, tussen dwarsbalk regterpunt
en die ankerpaal se voet,
die vyfde ster dofweg ingesluit
as handtekening van Suiderkruis oorspronklikheid.
Seevaarders, eeue terug, het die eerste probeer
om op reis, nut as kompas daaruit te verkry.
Trek ʼn loodlyn tussen die “Wysers” deur,
verleng die ankerpaal by sy voet verby
en daar waar dié twee lyne kruis,
siedaar, word die Suidpool presies aangewys.
Dink daaraan, ʼn houtskepie op die see
vir dae deur storm en wind heen en weer
geskud, getol, tot flenters verinneweer.
Dan, as die storm uiteindelik wyk
en ʼn sterbelaaide nag ontvou, ʼn kruis
van sterre, ʼn kompas wat rigting wys.
Oneindige simboliek kan tussen sterre gedy
wanneer die “Wysers” nuwe name kry:
“Vader” en “Heilige Gees” wat heen wys na:
“Jesus Christus” wat op die kruis ons sonde dra.
Hy is: “die Deur”. “die Weg”, die regte pad
na die nuwe Jerusalem, die Heilige Stad.
Die Goddelike Drie, as Een, voel gedring
om verdwaaldes terug op koers te bring.
Elke aand as die son in die Weste verdwyn,
begin die sterre geleidelik helderder te skyn
en met hulle word ʼn beeld duidelik gewys,
spesiaal vir my gemaak: die Suiderkruis!